Bloemhof-, PRG-leerders kry praat-sertifikate
Op Woensdag, 22 Maart, het die Paul Roos-Bloemhof Toastmasters-jeugleierskapprogram met ‘n swierige gala-geleentheid by die Japie Krigesaal by Paul Roos Gimnasium afgesluit. Veertien kandidate van Paul Roos en Hoër Meisieskool Bloemhof het sertifikate vir die voltooiing van die kursus ontvang. Hulle was Joscelyn van Wyk, Rohan van Loggerenberg, Benjamin Schoeman, Joshua van Graan, Altus Nel, Daniel Meintjies, Adriaan Kriel, Janco Kotzé, Arend Heÿl, Reuben de Wit, Andreas Hamersma, Waldo Bonthuys, Christiaan Esser en Friedrich Esterhuyse.
Die Toastmaster-jeugleierskapporgram is ‘n werkswinkel bestaande uit agt 2-uur sessies wat leerders bemagtig om hul kommunikasie- en leierskapvaardighede deur praktiese ondervinding te ontwikkel. In hierdie agt sessies het die deelnemende leerders geleer om hul eie praatvaardighede te evalueer, om toesprake voor te berei en met sukses te lewer, om onvoorbereide impromptu praatjies te lewer, om hul stem, woordeskat en gebare te beheer én konstruktiewe terugvoer te gee.
Paul Roos- en Bloemhof-leerders se benutting van die geleentheid om hul nuwe vaardighede met selfvertroue ten toon te stel, maak vir ‘n spesiale, innemende en gedagteprikkelende geleentheid. 2023 se Toastmasters gala-aand het weereens daarin geslaag om ‘n veilige ruimte te skep waarbinne jongmense bymekaar kon kom om kennis te kweek en oordraagbare vaardighede te bekom wat van onskatbare waarde is. Die Toastmasters-jeugleieskapprogram word gefassiliteer deur Breda Strasheim en Marita Strasheim van die Stellenbosch Toastmastersklub. Die geleentheid is moontlik gemaak deur ENSafrica – die trotse borg van PRG Forum, ‘n platvorm waar die praatkunste by Paul Roos Gimnasium beoefen word.
Agter (links na regs): N. Pilkington, Joshua van Graan, Altus Nel, Janco Kotzè, Benjamin Schoeman, Arend Heÿl, Christiaan Esser, T. Pienaar, M. Strasheim en B. Strasheim.
Joscelynn van Wyk, Rohan van Loggerenberg, Benjamin Schoeman, Joshua van Graan en Altus Nel.
