Smit moet omsien na strategiese leierskap
Die Universiteit Stellenbosch (US) het prof Nicola Smit as die instelling se uitvoerende bedryfshoof (UBH) aangestel en het daarmee sy uitvoerende leierskap versterk terwyl dit sy fokus op institusionele doeltreffendheid, operasionele uitnemendheid en langtermynvolhoubaarheid verskerp.
Die US-raad het Smit se aanstelling as UBH op (21 Oktober by ‘n spesiale vergadering goedgekeur. Sy sal die pos op 1 November 2026 vir ‘n vyfjaartermyn aanvaar.
Haar aanstelling volg op die US se besluit om die UBH en uitvoerende finansiële hoof (UFH) as twee afsonderlike uitvoerende portefeuljes te vestig, wat groter strategiese fokus en aanspreeklikheid ten opsigte van sy bedryfs- en finansiële omgewings moontlik maak.
Prof Deresh Ramjugernath, die US se rektor en visekanselier, het gesê die aanstelling kom op ‘n belangrike tydstip waar universiteite toenemende finansiële druk en veranderende verwagtinge, asook die behoefte om meer doeltreffend met beperkte hulpbronne te funksioneer, in die gesig staar.
“Universiteite het bedryfsomgewings nodig wat nie net doeltreffend en finansieel verantwoordelik is nie, maar ook behendig, innoverend en responsief op die behoeftes van hulle akademiese gemeenskappe kan reageer. Deur toegewyde UBH- en UFH-portefeuljes te vestig, versterk ons ons vermoë om hierdie uiters belangrike funksies met groter fokus en strategiese bedoeling te lei.
“Smit beskik oor ‘n waardevolle kombinasie van akademiese leierskap, institusionele kennis en uitvoerende ondervinding. Haar begrip van die universiteit se akademiese missie, tesame met haar bewese vermoë om komplekse bedryfsuitdagings te navigeer, posisioneer haar goed om hierdie portefeulje te lei.”
Smit sal aan die rektor en visekanselier verslag doen en strategiese en geïntegreerde leierskap oor die universiteit se bedryfsomgewing heen bied, insluitende infrastruktuur- en kampusontwikkeling, fasiliteitsbestuur, informasietegnologie, institusionele steundienste, sport, veiligheid en risikobestuur.
Een van haar kernprioriteite sal wees om te verseker dat hierdie funksies as ‘n geïntegreerde en ondersteunende omgewing vir die US se akademiese, navorsings- en maatskaplike impakmissies saamwerk.
Haar pos sal ook ‘n sleutelrol speel in die bevordering van digitale transformasie, die modernisering van institusionele prosesse, die versterking van bedryfsveerkragtigheid en die versekering dat die US se kampusse en geriewe ‘n inklusiewe, veilige en hoë-gehalte ondervinding vir studente en personeel ondersteun.
“Ons ambisie is om ‘n universiteit te bou waar ons stelsels, infrastruktuur en dienste uitnemendheid eerder moontlik maak as om dit te beperk,” het Ramjugernath gesê. “Prof Smit sal ‘n sentrale rol daarin speel om ons Visie 2040-ambisies in institusionele vermoëns en alledaagse bedryfswerklikheide om te skakel wat dit haalbaar maak.”
Smit het in Augustus 2017 as die dekaan van die fakulteit regsgeleerdheid by die Universiteit aangesluit. Voor dit was sy uitvoerende dekaan van die regsfakulteit aan die Noordwes-Universiteit en vise-dekaan van die regsfakulteit aan die Universiteit van Johannesburg. Sy het ook as mededirekteur van die sentrum vir internasionale vergelykende arbeidsreg en maatskaplike sekerheidsreg aan die Universiteit van Johannesburg gedien. Sy was die eerste vrou om verskeie van hierdie poste te beklee.
Haar uitgebreide ondervinding in hoëronderwysleierskap, aangevul deur haar diens in die gekombineerde rol van waarnemende UBH en UFH, het haar ‘n breë perspektief op institusionele bestuur, hulpbronbestuur en die verhouding tussen akademiese prioriteite gegee.
Die voorsitter van die US Raad, Bernard Fick, het haar aanstelling verwelkom en gesê die besluit weerspieël die raad se verbintenis tot sterk, aanspreeklike institusionele leierskap.
“Die skeiding van die UBH- en UFH-portefeuljes is ‘n belangrike stap in die versterking van die universiteit se bestuurs- en uitvoerende kapasiteit. Dit bied die geleentheid vir groter fokus op bedryfsdoeltreffendheid terwyl dit toegewyde leierskap van die Universiteit se finansiële strategie en bestuur verseker.”