Heelwat PRG-leerders presteer
Verskeie leerders van Paul Roos Gimnasium het die afgelope paar weke puik prestasies op verskillende terreine behaal.
’n Gr. 11-leerder, AD le Hanie, het onlangs aan die SAARA Wes-Kaapse kampioenskappe deelgeneem en die volgende prestasie behaal: 10m Olimpiese (Presisiestaan) Mans, o.20 – goue medalje.
Hy het weer sy WP-kleure verwerf en is gekies om die Wes-Kaap te verteenwoordig by die SA-kampioenskappe wat in die Oktobervakansie in Klerksdorp plaasvind.
AD het ook die trofee ontvang vir die beste junior manspresisieskut van die jaar in die Wes-Kaap.
Glasson Osborne, ‘n gr. 12-leerder, is een van die top 60 hoërskoolfinaliste in ‘n landwye wiskundekompetisie..
Christian Sadie, ‘n oudleerder van Paul Roos en sy hoofafrigter, Keith Jansen, wat ook PRG se swemafrigter is, was deel van die paralimpiese sportspan wat pas aan die Tokyo-paralimpiese spele deelgeneem het.
Sadie is een van drie swemmers in die span wat vir vier of meer items gekwalifiseer het. Ander paralimpiese atlete wat dit vermag het is Natalie du Toit en Charle Bouwer.
