Proe veelsydigheid van chenin blanc
Om internasionale chenin blanc-dag in Junie te vier, mag dalk vreemd voel vir dié van ons wat midde-in die suidelike halfrond se winter is, maar hoewel ons dikwels verfrissende style van chenin blanc as ons gunsteling-somerwyn kies, is daar baie redes om ook gedurende die koeler maande chenin blanc te geniet – veral omdat hierdie kultivar in verskillende style beskikbaar is.
Geniet die tradisionele, verfrissende somerwyne wanneer die son skyn, kies die meer ernstige style met ’n bietjie eikehoutveroudering vir ware wintergerief, en bederf jouself met die vreugde van ’n natuurlik soet chenin blanc – saam met nagereg of as nagereg.
Sluit by ons aan vir ’n spesiale proe van ’n trio chenin blanc-wyne by Leopard’s Leap en ontdek die verfrissende 2026 Classic Chenin Blanc, die gesofistikeerde 2024 Culinaria Chenin Blanc, wat in eikehout verouder is, asook die Culinaria Natural Sweet Chenin Blanc.
Proetye: Dinsdag – Sondag: 09:00 – 17:00
13 Junie is internasionale chenin blanc-dag, maar ons vier dit die hele Junie met 10% afslag wanneer jy enige ses bottels chenin blanc gedurende die maand koop. Dis natuurlik ook aanlyn beskikbaar.
Wat ons aanbeveel:
2026 Leopard’s Leap Chenin Blanc – ’n verfrissende wyn met kruidagtige geure, ideaal vir sonnige weer en lang middagetes. Jy sal dalk moet wag vir ’n sonnige wintersnaweek, maar wanneer dit aanbreek, dek ’n tafel in ’n sonnige hoekie en bedien jou liggies verkoelde chenin blanc saam met iets eenvoudigs soos ’n warm aartappelslaai, Toskaanse ravioli of tuisgemaakte pizza.
2025 Culinaria Chenin Blanc – as deel van ons Culinaria-versameling is hierdie chenin blanc geïnspireer deur die oorspronklike Franse styl en die uitsonderlike wyne van die Loire-streek, waar produsente in gebiede soos Vouvray, Savennières en Bonnezeaux van eikehoutgisting gebruik maak. Die 2025 Culinaria Chenin Blanc bied komplekse lae van geur en ’n gladde tekstuur wat dit ’n uitsonderlike witwyn vir die winter maak. Sy veelsydigheid as kosmaat verseker ook dat jy jou gunsteling wintergeregte daarmee kan geniet. Probeer ’n bredie soos Chicken Normandy of Chicken Fricassee. Voeg garnale by jou macaroni-en-kaas vir ’n eenvoudige gourmet-ervaring, of hou dit maklik met winkel-gekoopte gnocchi in ’n suurlemoenroomsous met Parmesaan. Jy kan ook tyd voor die oond deurbring – winter is immers die ideale bakseisoen! Probeer ons dadel- en amandelquiche, ’n ware bederf saam met die 2025 Culinaria Chenin.
Culinaria Natural Sweet Chenin Blanc – hoewel chenin blanc se natuurlike suurheid dit ’n uitstekende kultivar vir droë wyne maak, ongeag of die styl vars en lewendig of voller en sagter is, leen dit hom ook uitstekend tot halfdroë en selfs verleidelik soet wyne. Voeg ’n bietjie drama by jou nagereg en bedien ’n elegante glasie saam met ’n seisoenale nagereg soos sitrusagtige Crêpes Suzette. Of hou dit eenvoudig en maak die nageregwyn self jou nagereg – dit bring al die soet genot waarna ’n mens verlang.
